جلوبەرگی کوردی تەنیا پارچەیەک قوماش نییە بۆ خۆپۆشین بەڵکوو پەڕتووکێکی کراوەی مێژوویی هێمایەکی ڕەسەن و ڕەنگدانەوەی ڕۆحی بەرزی نەتەوەیەکە

تاجی ڕەسەنایەتی و مێژوو لە کەوای سەدساڵەی حەفسەخانەوە تا جوانیی جلوبەرگی کوردی لە هەموو کوردستاندا

جلوبەرگی کوردی تەنیا پارچەیەک قوماش نییە بۆ خۆپۆشین بەڵکوو پەڕتووکێکی کراوەی مێژوویی هێمایەکی ڕەسەن و ڕەنگدانەوەی ڕۆحی بەرزی نەتەوەیەکە کە لە قووڵایی شارستانییەتەوە هەڵقوڵاوە ئەم بەرگە پیرۆزە لە سەردەمانێکی دوورەوە تا ئەمڕۆ نەک هەر پارێزەری جەستە بووە بەڵکو وەک تاجێکی ڕێز و شکۆ مۆرکی خۆی لەسەر هەموو نەوەیەک جێهێشتووە هیوادارم جلوبەرگی کوردی هەر بە ڕەسەنایەتیی خۆی بمێنێتەوە و دەستکاری نەکرێت چونکە ئەمە میراتێکی گرانبەهایە کە بە خوێن و دڵ پارێزراوە

کاتێک باس دەکەینە سەر دەڤەری مەزن و ڕەسەنی مکریان (بۆکان مەهاباد و دەوروبەری) وردکارییەکان پڕن لە شاکاری دەستی خانمان لەم ناوچەیەدا خانمان کراسی کوردی پشتێن دەسماڵ و «کۆڵوانە» بەکاردەهێنن کە جوانییەکی بێوێنە بە پۆشاکەکە دەبەخشن کۆڵوانە و ئەو خشڵ و ڕازاندنەوانەی تایبەتن بە موکریان مۆرکێکی تایبەتیان هەیە و کراسی درێژ و ڕەنگاوڕەنگ لەگەڵ پشتێن و دەسماڵدا هاوسەنگییەکی سەرنجڕاکێش لە نێوان ڕەنگە گەشەکانی سروشتدا دروست دەکەن

ئەم دەوڵەمەندییە فەرهەنگییە لە هەموو پارچە و ناوچەیەکی کوردستاندا بە شێوازێکی جیاواز و پڕ لە شکۆ دەردەکەوێت

کرماشان ئیلام و سەقز (کەلهوڕ) کڵاوی کەلهوڕی و سەرپۆشە بەهەیبەتەکان کە لە چەرم و قوماشی ڕەق دروست کراون و بە گوڵوەنی شەدە گوڵێنگ و شیلان ڕازێنراونەتەوە هێمای ئازایەتی و شایستەیین هەروەها کەوای شۆڕ و سوخمە و ئەو پارچە ڕەسەنانەی کە لەو دەڤەرانەدا باوون مێژوویەکی قووڵیان هەەیە

هەورامان لانکەی ڕەسەنایەتی و سادەیی ژنانیش بە کراس و هێلاگ و سەرپۆشە تایبەتەکانیان دەناسرێنەوە

سلێمانی و شارەزوور لانکەی مێخەکبەند کڵاوی قوتووی زێڕین و کراسی سەرنجڕاکێش کە شاکاری هونەریی دەستی ئافرەتانی شارن

بادینان هەولێر دهۆک و زاخۆ پۆشاکی دەوڵەمەند بە ڕەنگە تێرەکان قوماشی قەیفە و پارچە نەخشینەکان کە گوزارشت لە دەشتایی و کێوە کانی ئەو دەڤەرانە دەکەن

گەرمیان و هەڵەبجە جلوبەرگە ڕەسەنەکانی گەرمەسێر و ناوچە دێرینەکانی باشوری کوردستان کە هەمیشە سیمبولێکی بەرزی نەتەوەیی بوون و بە فێنکی و شایستەیی ناسراون

ئەو کەوایەی کە دەگەڕێتەوە بۆ خاتوونی مەزن و نیشتمانپەروەر «حەفسەخانی نەقیب» تێکەڵەیەکە لە چەند پارچە و نەخشێکی دێرین کە دوای سەد ساڵ هێشتا زیندوون و ئێمە کەلکی لێ وەردەین کڵاو شەدە گوڵوەنی کۆڵوانە و هەموو ئەو خشڵ و کەرەستە جوانکارییانە مێژوو و کەلتوری دابونەریتی ژنانی کوردن کە ئێمە بە شانازییەوە زیندووی دەکەینەوە و پارێزگارییان لێ دەکەین

ئەمڕۆ کاتێک من خۆم کڵاو و کەوایەکی شۆڕم هەیە کە تەمەنی سەد ساڵە و نەوە دوای نەوە گەیشتووەتە دەستی من و پاراستوومە بە ڕاستی هەست بەو بەرپرسیارێتییە گەورەیە دەکەم کە پاسەوانیی ئەم مێژوو و ناسنامە پیرۆزەین با ئەم کەلەپوورە بە جوانی بپارێزین و بۆ نەوەکانی داهاتووی بهێڵینەوە...